HALIMA KHALIF MAGOOL
Birth Country: Somali Singer: Waaberi group

Yaa buuxin kara Kaalintii Magool?

Fanaaninta ka hadashay geerida Magool waxaa ka mid ah Shamso Abokor Ismaaciil "Gaduudo Carwo" Abwaan Maxamed Ibraahim Warsame "Hadraawi" Abwaan Siciid Xarawo Qadra Daahir Cige, Abwaan Cabdi Dhuux Yuusuf dhamaantooda waxa ay xuseen in ay aheyd fanaanad la jecel yahay oo qiimo ku leh bulshadeeda.

Sidoo kale Fanaaniinta ka hadashay geerida Alle ha u naxariistee Xaliima Khaliif Magool ayaa waxaa ka mid ahaa Safiya Geele, Aamina Sahra, Cabdi Tahliil Warsame, Shamso Maxamuud Xirsi "Daadsan" Cabdi Maxamuud "ilkacase" Nadiifa Cali Kulane iyo kuwa kale.

Xaliima Kahiif Magool waxyaabaha sida weyn loogu ammaanay oo ilaahay hibada u siiyay ka sokow codkeedii macaanaa waxa ka mid ahaa maskaxda ama fahamkeeda oo aad u sareeyey.

Cabdikariim Faarax Jiir oo ah ninka inta badan heesaha ay ku luuqeyn jirtay Laxanka saaray ayaa waxa uu muujiyay qaabkii intii ay wada shaqeeynayeen Magool ay u muuqatay isagoo sheegay in ay islamarkiiba ay qaban jirtay heesaha iyo laxanka oo aheyd qof maskax furan.

Abwaaniinta iyo Fanaaniinta inta badan waxa ay isku raacsan yihiin in aanay jirin qof buuxin karta booskii Fanka oo ay baneeysay Alle ha u naxariistee Xaliima Khaliif Magool.

Alle ha u naxariistee Magool waxa ay dhalatay sanadkii 1948-kii waxa ayna ku dhalatay magaalada Baladweyne ee gobalka Hiiraan,waxa ayna ka soo jeeday qoys ka kooban Shan qof iyo Hooyadeed iyo Aabaheed, waxaa imminka nool Afar walaalaheed ah.

Magool wax carruur ah kama tegin, Alle ha u naxariistee shalay ayey marxuumadu ku geeriyootay magaalada Amsterdam ee dalka Hollond waxaana tacsi u diraya dhammaan ummadda Soomaaliyeed "Inaa lilaahi Wa Inaa Ileyhu Raajacuun"

Waxaa diyaariyey:

Idaacada HornAfrik.

Mogadisho, Somalia